Free Web Hosting Provider - Web Hosting - E-commerce - High Speed Internet - Free Web Page
Search the Web

       الحلقة الأولى(1)

 

 

السلام عليكم                              

 

انتم تعرفون عدنان ولينا كويس   بس نسيتوهم....

 انا عندي آخر اخبارهم  عدنان تزوج لينا بعد المسلسلة على طول وعاشوا في الجزيرة المفقودة جزيرة جد عدنان  بس قبل ما يتزوج لينا صارت أحداث....

 كان الدكتور رامي الله يرحمه  موصي لينا انها ماتتزوج عدنان الا لما  يلبس ثوب وشماغ ويصير رجال  ويترك عنه الشطانة  ولا يطق احد ويصلي بالمسيد وخاصة الفجر.

يوم جاء عدنان يبي يخطب لينا من عمته اللي بجزيرة الأمل تذكرونها اللي طاحت على بيتها قذيفة من مركب الرماية حق القلعة اللي تسوقها سميرة.

المهم يوم جاء يخطبها قالت له لينا: اني ياعدنان احبك بس جدي رامي الله يرحمه موصيني  انك لازم تلبس ثوب وتغدي رجال  , قالها عدنان يابنت الحلال انتي تبين تزوجيني والا  تبي تزوجين ثوبي  أهم شي الجوهر- مهو ناصر الجوهر مدرب منخبنا الله يوفقه -المهم قالها ان الرجال بأخلاقه مو بمظهره ومن هالكلام . المهم لينا مااقتنعت قالت : بس ياعدنان جدي رامي الله يتغمد روحة الينه (على قولت الكويتيين)  موصيني  بهالوصايا  وأنا آسفة ياعدنان إذا قلت لك اني ارفض الزواج منك لما  تحقق وصية جدي . المهم عدنان تعرفونه راسه يابس وهو بنفس الوقت يحب لينا مشى  وطلع من  بيت عمتة لينا حتى القهوة ماشربها طلع وهو معصب يوم جاء يبي يركب قاربه يبي يرجع لجزيرة جده قابلة القبطان نامق وعبسي وقالوا له وش فيك ياعدنان  ليش معصب قال ابد مافيه شي بس لينا ما هي راضية تتزوجني وعلمهم بالقصة, جاء نامق وبدأ يقنع عدنان وقاله: ان الزمن تغير وبنات هاليومين مالهن الا رايهن فأنت البس ثوب وتزوجها وبعد ماتتزوجها افصخة قال عدنان: معصي انت تعرف يابو طلال - نامق جاه ولد من سميرة وسماه طلال تيمنا بأحد بحارته اللي ماتوا وتخليدا لذكراه) المهم قال عدنان : يابو طلال  انت تعرف اني مأحب الثوب انا راعي كشتات وصيد وسعة صدر والثوب يضايقني .

و بنفس الوقت كان عبسي مشغول  معه ضفدع يعرمشه  جاء وقال لعدنان اسمع يابعد عمري ياعدنان -  عاد انتم تعرفون عدنان يعز عبسي- قاله اسمع انت لازم تتزوج لينا لا بكرا تروح عليك البنية ترا نمرو هالخبيث يخطط عليها - طبعا عبسي منقهر من نمرو أعلمكم بعدين ليش- المهم بدأ عدنان يلين شوي وقعد يفكر وحسبها زين  قال ايه  والله باكر تروح البنية واتوهق انا وابتل عزوبي  .

جاء ابوطلال وعبسي وقالواله: امش يارجال ارجع خلنا نخطبها لك  قال عدنان : اوكي يالله .

ولما كانوا رايحيين لبيت عمة لينا لخطبتها فجأة قابلهم  من تتوقعون...............في الحلقة القادمة نكمل

   

-----------------------------------------------------------------------

(2) الحلقة الثانية

وصلنا بالحلقة اللي راحت ان عدنان وعبسي ونامق(ابو طلال) رايحين يخطبون لينا وهم راجعين

قابلوا منهو توقعوا منهو لالالا منهو منهو معقول اللي قابلوه.قابلوا  البس ابو سبعة ارواح  الدختور علام الألتغ  راعي القلعه  يامن الضربة تصدقون مامات  عقب يوم يمسط على جمانة وهي تحترق  نحسبه مات  .

المهم  يوم قابلوا الدكتور علام   كان علام  الهدر  ماسك لينا مع شوشته وحاط المسدس ابو محاله على راس هالمسيكينة ويهدد عدنان انه إذا قرب والا حاول يسوي أي شي  انه يفضخ راس لينا  مير يوخرعدنان ويتعوذ من ابليس.  بس عدنان منتفش وعاضن سنونه  منقهر ,

علام هالسربوت كان يبي ياخذ لينا رهينه معه يبي هالطاقة الشمسية , الى هالحين منهبل بهالطاقة

جاء عدنان وقال لعلام : اسمع ياعلام والله ان ماتركت لينا انه ترى موب ازين لك ان تشوف علما ثاني معاد الا هي,  يوم انت تمسك لينا منول ماقلنا شي علشان جدها هالنكبة اللي يعرف الطاقة الشمسية بس هالحين انت تاخذ لينا وشو له ولا واحد منا يعرف شي عن الطاقة كلنا رخوم شف عبسي هذا وجه يعرف طاقة   اصلا عبسي ماكمل السادسة لا ومن زينه يدرس ليلي بعد وكل حياته ضفادع وسراوه. ونامق متخرج من المهني قسم تبريد , وأنا  أدبش منهم ما عرف الا اطق واتشعمط على الجدران  واصيد وبس .

لذلك ياعلام ادحر الشيطان وخل لينا هالمسيكينة وانت كانك تبي تعيش معنا على هالجزيرة اقعد ماحد رادك بس على شرط انك تنضبط. وسو لك مشروع صغير مثل محل خضار وترزق الله منه وجب لك صبي بس لازم يكون سعودي  ترى هاليومين البلدية مشددين على السعودة .

رد علام وقال : خل عنك الخربطة انت وجهك تدري انا ليش ماسك لينا وين الوثائق والاوراق حقت الدكتور رامي اللي عن الطاقة الشمسية يقول نمرو انه معك.

قال عدنان : يابن الحلال انت تصدق نمرو الدلخ  هذا  نصاب و سوسة .

قال علام : انا مالي دخل تجيب لي الاوراق والا اذبح لينا .

وبعد شوي جت  أم طلال سميرة مرت نامق .

 قالت وش بكم يدافع البلا منهو ذا اللي ماسك لينا مع شوشته  

قال عدنان : انتي ماعرفتيه يام طلال .

تدخل نامق : اقول يامره وش اللي جابت طسي روحي لعيالك هماني قايل لك لاتطلعين من البيت.

قال عدنان: على هونك يابو طلال خل سميرة تتفاهم مع علام.

يوم سمعت سميرة ان اللي قدامها الدكتور علام امر يغمن عليها لان علام كان وجهه محترق مهو باين وماصدقت انه حي.

نامق بلش بمرته قاعدن  يصحيها .

وعدنان بلش بهالمطيور علام ولينا حبيبته.

أجل عبسيي وينه...........................في الحلقة القادمة نكمل